'നിരാശാജനകം'; ഷിംജിതയ്ക്ക് ജാമ്യം അനുവദിച്ചതിനെതിരെ ദീപക്കിന്റെ കുടുംബം

FEBRUARY 11, 2026, 5:00 AM

കോഴിക്കോട്: ഗോവിന്ദപുരം സ്വദേശി ദീപക് ജീവനൊടുക്കിയ കേസിൽ പ്രതിയായ ഷിംജിതയ്ക്ക് ജാമ്യം അനുവദിച്ചതിനെതിരെ ദീപക്കിന്റെ കുടുംബം. ജാമ്യം ലഭിച്ചത് നിരാശാജനകമാണെന്നും ഇത്തരത്തിൽ ജാമ്യം അനുവദിക്കരുതായിരുന്നുവെന്നും കുടുംബം പ്രതികരിച്ചു. ദീപക്കിന് നീതി ലഭിക്കുന്നതുവരെ നിയമപരമായി പോരാട്ടം തുടരുമെന്നും അവർ വ്യക്തമാക്കി.

കേസിൽ അറസ്റ്റിലായിട്ട് 22 ദിവസങ്ങൾക്ക് ശേഷമാണ് ഷിംജിതയ്ക്ക് ജാമ്യം ലഭിച്ചത്. കോഴിക്കോട് പ്രിൻസിപ്പൽ സെഷൻസ് കോടതിയാണ് ജാമ്യം അനുവദിച്ചത്. വിശദമായ വാദം കേട്ട കോടതി ഹർജിയിൽ ഇന്നാണ് വിധി പ്രസ്താവിച്ചത്.

അമ്പതിനായിരം രൂപ വീതമുള്ള രണ്ട് ജാമ്യക്കാരുടെ ഉറപ്പിലാണ് ജാമ്യം അനുവദിച്ചത്. കൂടാതെ, ഓരോ മാസവും രണ്ടാമത്തെയും നാലാമത്തെയും വെള്ളിയാഴ്ച അന്വേഷണ ഉദ്യോഗസ്ഥന് മുന്നിൽ ഹാജരാകണം, സാക്ഷികളെ സ്വാധീനിക്കരുത്, സമാന കുറ്റകൃത്യങ്ങളിൽ ഏർപ്പെടരുത് തുടങ്ങിയ ഉപാധികളും കോടതി നിർദേശിച്ചു.