കല്യാണ സൽക്കാര ചടങ്ങിൽ നൽകിയത് പാൻ പരാഗ് മിഠായി?; അരുവിക്കരയിൽ എക്സൈസിന്റെ വ്യാപക പരിശോധന

JUNE 12, 2025, 10:29 PM

തിരുവനന്തപുരം: നിരോധിത ലഹരി ഉത്പന്നത്തിന്‍റെ രുചിയിൽ മിഠായി വിൽപ്പന നടത്തിയെന്ന് പരാതി. പരാതിക്ക് പിന്നാലെ അരുവിക്കരയിലും പരിസര പ്രദേശങ്ങളിലും എക്സൈസും ഫുഡ് ആൻഡ് സേഫ്റ്റിയും ആരോഗ്യ വിഭാഗവും സംയുക്ത പരിശോധന നടത്തി.

കഴിഞ്ഞ ദിവസം ആണ് സംഭവം ഉണ്ടായത്. അരുവിക്കരയിൽ നടന്ന ഒരു കല്യാണ സൽക്കാര ചടങ്ങിൽ മിഠായി കഴിച്ച പലർക്കും പാൻപരാഗിന്റെ ടേസ്റ്റ് അനുഭവപ്പെടുകയും അസ്വസ്ഥത പ്രകടിപ്പിക്കുകയും ചെയ്തിരുന്നതായി സാമൂഹ്യ മാധ്യമങ്ങളിൽ പ്രചാരണമുണ്ടായിരുന്നു.

അതേസമയം അരുവിക്കരയിലും പരിസര പ്രദേശങ്ങളിലും ഇത്തരം അനധികൃത മിഠായി വിൽപ്പന നടത്തുന്നതായും സ്കൂൾ കുട്ടികൾ ഉൾപ്പെടെയുള്ളവർ വാങ്ങി കഴിക്കുന്നതായും പ്രചാരണം ശക്തമായതോടെ ആണ് അധികൃതർ പരിശോധന ആരംഭിച്ചത്. എന്നാൽ അരുവിക്കര സ്കൂൾ പരിസരത്തും മുള്ളിലവൻമൂട് ജംഗ്ഷനിലും പരിശോധന നടത്തിയെങ്കിലും പരാതിയിൽ പറയുന്ന മിന്റോ പാൻ എന്ന മിഠായി കണ്ടെത്താനായില്ല. ഇന്ന് പരിശോധന തുടരും എന്നാണ് അധികൃതർ വ്യക്തമാക്കുന്നത്.