ശബരിമല സ്വർണക്കൊള്ള: ശാസ്ത്രീയ പരിശോധന വീണ്ടും നടത്താൻ കോടതി ഉത്തരവ്

FEBRUARY 9, 2026, 1:01 AM

കൊച്ചി: ശബരിമല സ്വർണക്കൊള്ള കേസിൽ സ്വർണപ്പാളികളിൽ വീണ്ടും ശാസ്ത്രീയ പരിശോധന നടത്താൻ ഹൈക്കോടതി നിർദേശം നൽകി. പ്രത്യേക അന്വേഷണ സംഘത്തിന്റെ (എസ്ഐടി) ആവശ്യത്തെ തുടർന്ന് പാളികളിൽ നിന്ന് സാമ്പിൾ എടുത്ത് വീണ്ടും പരിശോധന നടത്താനാണ് കോടതി ഉത്തരവിട്ടത്.

പാളികളിൽ സ്വർണം എത്രത്തോളം ഉള്ളുവെന്ന് കണ്ടെത്തുന്നതിനും അവയിൽ ഏതെങ്കിലും തരത്തിലുള്ള മാറ്റം സംഭവിച്ചിട്ടുണ്ടോ എന്ന് ഉറപ്പാക്കുന്നതിനുമാണ് പരിശോധന. ശാസ്ത്രീയ തെളിവുകൾ ശേഖരിക്കുന്നതിനായി മുംബൈയിലെ ഭാഭാ അറ്റോമിക് റിസർച്ച് സെന്ററിലേക്ക് സാമ്പിളുകൾ അയക്കാനാണ് കോടതി നിർദേശം നൽകിയിരിക്കുന്നത്.

കേസിൽ ഇടക്കാല ഉത്തരവാണ് ഹൈക്കോടതി പുറപ്പെടുവിച്ചത്. അടച്ചിട്ട മുറിയിലാണ് കേസ് പരിഗണിച്ചത്. കേസ് ഫെബ്രുവരി 19ന് വീണ്ടും പരിഗണിക്കും.