നടി നിലീൻ സാന്ദ്ര വിവാഹിതയാകുന്നു; വരൻ സംവിധായകൻ ശ്യാമിൻ ഗിരീഷ്

FEBRUARY 22, 2026, 10:59 PM

കരിക്ക് വെബ് സീരീസിലൂടെ ശ്രദ്ധ നേടിയ നടി നിലീൻ സാന്ദ്ര വിവാഹിതയാകുന്നു. സന്തോഷവാർത്ത താരം തന്നെയാണ് സോഷ്യൽ മീഡിയ വഴി പങ്കുവെച്ചത്.

‘ഇറ്റ്സ് എ മെഡിക്കൽ മിറാക്കിൾ’ എന്ന ചിത്രത്തിന്റെ സംവിധായകനായ ശ്യാമിൻ ഗിരീഷ് ആണ് വരൻ. സംഗീത് പ്രതാപ്, ഷറഫുദ്ധീൻ, അഖില ഭാർഗവൻ എന്നിവർ പ്രധാന കഥാപാത്രങ്ങളായി എത്തുന്ന ചിത്രമാണിത്. ചിത്രത്തിൽ ഒരു പ്രധാന വേഷത്തിൽ നിലീനും അഭിനയിക്കുന്നുണ്ട്. കൂടാതെ ചിത്രത്തിന്റെ തിരക്കഥ ഒരുക്കിയിരിക്കുന്നത് നിലീൻ സാന്ദ്ര തന്നെയാണ്.

“2017-ൽ ദൈവം എനിക്കായി എന്റെ ആളെ അയച്ചു. ഒരു കാമുകനായി അല്ല, എന്റെ ഏറ്റവും പ്രിയപ്പെട്ട സുഹൃത്തായി. വർഷങ്ങൾക്കിപ്പുറം, അന്ന് സുഹൃത്തായി നിന്ന അതേ മനുഷ്യനൊപ്പം എന്നെന്നേക്കുമായി ഒന്നാകാൻ ഞാൻ തയ്യാറെടുക്കുന്നു. ഞാൻ വെറുതെ വിവാഹിതയാകുന്നത് അല്ല… വർഷങ്ങൾക്ക് മുൻപ് ദൈവം എനിക്കായി അയച്ചുതന്ന വലിയ അനുഗ്രഹത്തെയാണ് ഞാൻ വിവാഹം കഴിക്കുന്നത്” എന്നാണ് വിവാഹവാർത്ത പങ്കുവെച്ചുകൊണ്ട് നിലീൻ ഇൻസ്റ്റാഗ്രാമിൽ കുറിച്ചത്. നിലീൻ സാന്ദ്രയുടെ കുറിപ്പിന് പിന്നാലെ നിരവധി ആരാധകരും സഹപ്രവർത്തകരും ആശംസകളുമായി രംഗത്തെത്തി.