നടന്‍ ചാൻസ് പെർഡോമോ ബൈക്ക് അപകടത്തില്‍ മരണപ്പെട്ടു; ഞെട്ടലിൽ ആരാധകർ

MARCH 31, 2024, 11:26 PM

നടന്‍ ചാൻസ് പെർഡോമോ ബൈക്ക് അപകടത്തില്‍ മരണപ്പെട്ടു. 27 വയസായിരുന്നു. "ചില്ലിംഗ് അഡ്വഞ്ചേഴ്‌സ് ഓഫ് സബ്രീന", "ജെന്‍ വി" എന്നീ വെബ് സീരിസുകളിലൂടെ ശ്രദ്ധേയനായിരുന്നു അദ്ദേഹം. പെർഡോമോയുടെ മനേജിംഗ് ടീം ഒരു പ്രസ്താവനയിലൂടെ ഈ വാർത്ത സ്ഥിരീകരിച്ചു.

“ഒരു മോട്ടോർ സൈക്കിൾ അപകടത്തിന്‍റെ ഫലമായി ചാൻസ് പെർഡോമോ അകാലത്തില്‍ നമ്മെ വിട്ടുപിരിഞ്ഞ വാര്‍ത്ത അതീവ ദു:ഖത്തോടെ അറിയിക്കുന്നു. മാറ്റാരും ഈ അത്യാഹിതത്തില്‍ ഉള്‍പ്പെട്ടിട്ടില്ലെന്നും" അധികൃതർ അറിയിച്ചു.

"കലയോടുള്ള അദ്ദേഹത്തിന്‍റെ അഭിനിവേശവും ജീവിതത്തോടുള്ള അടങ്ങാത്ത ആഗ്രഹവും അദ്ദേഹത്തെ അറിയുന്ന എല്ലാവർക്കും അറിയാവുന്നതാണ്. തങ്ങളുടെ പ്രിയപ്പെട്ടവന്‍ നഷ്ടപ്പെട്ട കുടുംബത്തിന്‍റെ സ്വകാര്യതയെ എല്ലാവരും മാനിക്കണമെന്നും അപേക്ഷിക്കുന്നു" എന്നും പ്രസ്താവനയില്‍ പറയുന്നു.