ട്രംപിന്റെ ആഗോള മാനുഷിക സഹായ നിർത്തലാക്കൽ; അഞ്ചു വർഷത്തിനുള്ളിൽ 1.4 കോടി മരണം സംഭവിച്ചേക്കുമെന്ന് റിപ്പോർട്ട്

JULY 1, 2025, 1:43 AM

വാഷിംഗ്ടൺ: യു.എസ്. പ്രസിഡന്റ് ഡൊണാൾഡ് ട്രംപിന്റെ ഭരണകൂടം വിദേശ മാനുഷിക സഹായങ്ങൾക്കുള്ള യു.എസിന്റെ ഫണ്ടുകൾ വെട്ടിക്കുറച്ചത് അഞ്ചു വർഷത്തിനുള്ളിൽ 1.4 കോടിയിലധികം ആളുകളുടെ മരണത്തിന് കാരണമായേക്കുമെന്ന് പഠനം. ലോകത്തെ മുൻനിര മെഡിക്കൽ ജേണലുകളിലൊന്നായ 'ദ ലാൻസെറ്റി'ൽ പ്രസിദ്ധീകരിച്ച പുതിയ പഠന റിപ്പോർട്ടിലാണ് ഞെട്ടിക്കുന്ന ഈ കണ്ടെത്തലുകൾ ഉള്ളത്. അകാല മരണത്തിന് സാധ്യതയുള്ളവരിൽ മൂന്നിലൊന്ന് പേരും കുട്ടികളാണെന്നും പഠനം വ്യക്തമാക്കുന്നു.

ട്രംപ് ഭരണകൂടം യു.എസ്. ഏജൻസി ഫോർ ഇന്റർനാഷണൽ ഡെവലപ്‌മെൻ്റ് (USAID) വഴിയുള്ള 80 ശതമാനത്തിലധികം പദ്ധതികളും റദ്ദാക്കിയതായി യു.എസ്. സ്റ്റേറ്റ് സെക്രട്ടറി മാർക്കോ റൂബിയോ കഴിഞ്ഞ മാർച്ചിൽ അറിയിച്ചിരുന്നു. ഈ ഫണ്ട് വെട്ടിക്കുറയ്ക്കൽ പല ദരിദ്ര, ഇടത്തരം വരുമാനമുള്ള രാജ്യങ്ങൾക്കും ഒരു ആഗോള മഹാമാരിയോ വലിയ സായുധ പോരാട്ടമോ ഉണ്ടാക്കുന്ന ആഘാതത്തിന് തുല്യമായിരിക്കുമെന്ന് ലാൻസെറ്റ് റിപ്പോർട്ടിന്റെ സഹ രചയിതാവായ ഡേവിഡ് റാസെല്ല പറഞ്ഞു. ബാഴ്‌സലോണ ഇൻസ്റ്റിറ്റ്യൂട്ട് ഫോർ ഗ്ലോബൽ ഹെൽത്തിലെ ഗവേഷകൻ കൂടിയായ റാസെല്ല, ഈ ഫണ്ട് വെട്ടിക്കുറയ്ക്കൽ ദുർബല ജനവിഭാഗങ്ങൾക്കിടയിൽ ആരോഗ്യമേഖലയിൽ കഴിഞ്ഞ രണ്ട് പതിറ്റാണ്ടായി നേടിയ പുരോഗതിയെ പെട്ടെന്ന് തടസ്സപ്പെടുത്തുകയും പിന്നോട്ട് വലിക്കുകയും ചെയ്യുമെന്നും കൂട്ടിച്ചേർത്തു.

ഒരു ദശാബ്ദത്തിനിടെ നടക്കുന്ന ഏറ്റവും വലിയ യു.എൻ. നേതൃത്വത്തിലുള്ള സഹായ സമ്മേളനത്തിനായി ലോക നേതാക്കൾ സ്പാനിഷ് നഗരമായ സെവില്ലെയിൽ ഒത്തുകൂടുന്ന സമയത്താണ് ഈ റിപ്പോർട്ട് പുറത്തുവരുന്നത്. 133 രാജ്യങ്ങളിൽ നിന്നുള്ള വിവരങ്ങൾ പരിശോധിച്ച ഗവേഷക സംഘം, 2001-നും 2021-നും ഇടയിൽ USAID ഫണ്ടിംഗ് വികസ്വര രാജ്യങ്ങളിൽ 9.1 കോടി മരണങ്ങൾ തടയാൻ സഹായിച്ചതായി കണ്ടെത്തി. യു.എസ്. സർക്കാർ ഈ വർഷം ആദ്യം പ്രഖ്യാപിച്ചതുപോലെ ഫണ്ടിംഗ് 83% വെട്ടിക്കുറച്ചാൽ മരണനിരക്കിനെ അത് എങ്ങനെ ബാധിക്കുമെന്നും അവർ പഠനത്തിലൂടെ വിലയിരുത്തി.

ഈ വെട്ടിക്കുറയ്ക്കലുകൾ 2030-ഓടെ 1.4 കോടിയിലധികം ഒഴിവാക്കാവുന്ന മരണങ്ങളിലേക്ക് നയിച്ചേക്കാമെന്നാണ് പ്രവചനം. ഈ കണക്കിൽ അഞ്ച് വയസ്സിന് താഴെയുള്ള 45 ലക്ഷത്തിലധികം കുട്ടികളും ഉൾപ്പെടുന്നു - അതായത് പ്രതിവർഷം ഏകദേശം 7 ലക്ഷം കുട്ടികളുടെ മരണം. ചെലവ് ചുരുക്കുന്നതിന്റെ ഭാഗമായി ഫെഡറൽ ജീവനക്കാരുടെ എണ്ണം കുറയ്ക്കാൻ ലക്ഷ്യമിട്ട ട്രംപ് ഭരണകൂടം, USAID ലിബറൽ പദ്ധതികളെ പിന്തുണയ്ക്കുന്നുവെന്നും ആരോപിച്ചിരുന്നു.