ടെഹ്‌റാന്‍: ആണവ നിര്‍വ്യാപന ഉടമ്പടി (എന്‍പിടി) ഉപേക്ഷിക്കുമെന്ന് ഇറാന്‍. ഇതിനായുള്ള ബില്‍ ഇറാന്‍ പാര്‍ലമെന്റ് തയ്യാറാക്കിക്കൊണ്ടിരിക്കുകയാണെന്ന് ഇറാന്‍ വിദേശകാര്യ മന്ത്രാലയം തിങ്കളാഴ്ച അറിയിച്ചു. കൂട്ട നശീകരണ ആയുധങ്ങള്‍ വികസിപ്പിക്കുന്നതിനെ ടെഹ്‌റാന്‍ ഇപ്പോഴും എതിര്‍ക്കുന്നുവെന്നും ഇറാന്‍ വിദേശകാര്യ മന്ത്രാലയം കൂട്ടിച്ചേര്‍ത്തു.

ആണവായുധങ്ങളുടെയും അനുബന്ധ സാങ്കേതികവിദ്യകളുടെയും വ്യാപനം തടയുക, ആണവോര്‍ജ്ജത്തിന്റെ സമാധാനപരമായ ഉപയോഗത്തില്‍ സഹകരണം പ്രോത്സാഹിപ്പിക്കുക, ആണവ നിരായുധീകരണം, സമ്പൂര്‍ണ്ണ ആഗോള നിരായുധീകരണം എന്നീ ലക്ഷ്യങ്ങള്‍ മുന്നോട്ട് കൊണ്ടുപോകുക എന്നിവ ലക്ഷ്യമിട്ടുള്ള ഒരു അന്താരാഷ്ട്ര കരാറാണ് ആണവ നിര്‍വ്യാപന ഉടമ്പടി. ഇതില്‍ നിന്ന് പിന്‍മാറുകയെന്നാല്‍ ആണവായുധ നിര്‍മാണത്തിലേക്ക് കടക്കുകയെന്നതാണ് അര്‍ഥം. 

ഇറാന്‍ ആണവായുധങ്ങള്‍ വികസിപ്പിക്കാന്‍ ഉദ്ദേശിക്കുന്നില്ലെന്നും ആണവോര്‍ജ്ജത്തിനും ഗവേഷണത്തിനുമുള്ള അവകാശം നിലനിര്‍ത്തുമെന്നും ഇറാന്‍ പ്രസിഡന്റ് മസൂദ് പെസെഷ്‌കിയാന്‍ നേരത്തെ പറഞ്ഞിരുന്നു. കൂട്ട നശീകരണ ആയുധങ്ങള്‍ക്കെതിരായ പരമോന്നത നേതാവ് ആയത്തുള്ള അലി ഖമേനിയുടെ മതപരമായ ശാസന അദ്ദേഹം ചൂണ്ടിക്കാട്ടി. 

ഇസ്രായേലുമായുള്ള സംഘര്‍ഷം രൂക്ഷമാകുകയും വിശാലമായ പ്രാദേശിക യുദ്ധത്തെക്കുറിച്ചുള്ള ഭയം വര്‍ദ്ധിക്കുകയും ചെയ്യുന്ന സാഹചര്യത്തിലാണ് ഇറാന്റെ നീക്കം. ആണവായുധം നിര്‍മ്മിക്കാന്‍ ആവശ്യമായ യുറേനിയം സമ്പുഷ്ടമാക്കാനുള്ള ടെഹ്‌റാന്റെ ശേഷി പരിമിതപ്പെടുത്താനുള്ള കരാറില്‍ നിന്ന് യുഎസ് പിന്മാറിയ 2018 മുതല്‍ ഇറാന്റെ ആണവ പദ്ധതി അതിവേഗം പുരോഗമിച്ചു. തങ്ങളുടെ പരിപാടി സമാധാനപരമാണെന്ന് ഇറാന്‍ വാദിക്കുന്നു. എന്നാല്‍ നിരവധി ആണവ ബോംബുകള്‍ നിര്‍മ്മിക്കാന്‍ ആവശ്യമായ സമ്പുഷ്ട യുറേനിയം ഇറാന്റെ പക്കലുണ്ടെന്ന് അന്താരാഷ്ട്ര ആണവോര്‍ജ്ജ ഏജന്‍സിയുടെ തലവന്‍ ആവര്‍ത്തിച്ച് മുന്നറിയിപ്പ് നല്‍കിയിട്ടുണ്ട്.

വാചകം ന്യൂസ് വാട്ട്സ് ആപ്പ് ഗ്രൂപ്പിൽ പങ്കാളിയാകുവാൻ ഇവിടെ ക്ലിക്ക് ചെയ്യുക .

ടെലിഗ്രാം :ചാനലിൽ അംഗമാകാൻ ഇവിടെ ക്ലിക്ക് ചെയ്യുക .

ഫേസ്ബുക് പേജ് ലൈക്ക് ചെയ്യാൻ ഈ ലിങ്കിൽ (https://www.facebook.com/vachakam/) ക്ലിക്ക് ചെയ്യുക.

യൂട്യൂബ് ചാനൽ:വാചകം ന്യൂസ്