പഹല്‍ഗാം ഭീകരാക്രമണം: ഇന്ത്യയുടെ പ്രകോപനത്തോട് ഉത്തരവാദിത്തത്തോടെയാണ് പ്രതികരിച്ചതെന്ന് പാക് പ്രധാനമന്ത്രി

MAY 3, 2025, 2:38 PM

ഇസ്ലാമാബാദ്: ജമ്മു കശ്മീരിലെ പഹല്‍ഗാമില്‍ നടന്ന ഭീകരാക്രമണത്തിന്റെ പശ്ചാത്തലത്തില്‍, ഇന്ത്യ നടത്തിയ പ്രകോപനങ്ങള്‍ക്ക് പാകിസ്ഥാന്‍ നല്‍കിയ മറുപടി 'ഉത്തരവാദിത്തപരവും കൃത്യതയുള്ളതുമാണെന്ന്' പാകിസ്ഥാന്‍ പ്രധാനമന്ത്രി ഷെഹ്ബാസ് ഷെരീഫ് അവകാശപ്പെട്ടു. തുര്‍ക്കി അംബാസഡര്‍ ഡോ. ഇര്‍ഫാന്‍ നെസിറോഗ്ലുവുമായുള്ള സംഭാഷണത്തിലാണ് ഷെരീഫിന്റെ അവകാശവാദം.

എല്ലാ രൂപത്തിലുമുള്ള ഭീകരതയെ പാകിസ്ഥാന്‍ എപ്പോഴും അപലപിച്ചിട്ടുണ്ടെന്നും പാക് പ്രധാനമന്ത്രി അവകാശപ്പെട്ടു. പഹല്‍ഗാം ഭീകരാക്രമണവുമായി ഇന്ത്യ രാജ്യത്തെ തെറ്റായി ബന്ധിപ്പിച്ചിട്ടുണ്ടെന്നും ഈ സിദ്ധാന്തത്തെ പിന്തുണയ്ക്കുന്നതിന് ഒരു തെളിവും ഹാജരാക്കിയിട്ടില്ലെന്നും അദ്ദേഹം പറഞ്ഞു.

പഹല്‍ഗാം സംഭവത്തിന് പിന്നിലെ വസ്തുതകള്‍ കണ്ടെത്തുന്നതിന് വിശ്വസനീയവും സുതാര്യവും നിഷ്പക്ഷവുമായ ഒരു അന്താരാഷ്ട്ര അന്വേഷണം നടത്താമെന്ന പാകിസ്ഥാന്റെ ആവശ്യത്തോട് ഇന്ത്യ ഇതുവരെ പ്രതികരിച്ചിട്ടില്ലെന്നും ഷെഹ്ബാസ് ഷെരീഫ് ആരോപിച്ചു.

പാക്കിസ്ഥാനിലെ തുര്‍ക്കി അംബാസഡറുമായുള്ള സംഭാഷണത്തിനിടെ, രാജ്യം ഒരു അന്താരാഷ്ട്ര അന്വേഷണവുമായി പൂര്‍ണ്ണമായും സഹകരിക്കുമെന്നും തുര്‍ക്കി അതില്‍ ചേരണമെന്ന് ആഗ്രഹിക്കുന്നുവെന്നും അദ്ദേഹം പറഞ്ഞു.

പാകിസ്ഥാനുള്ള തുര്‍ക്കിയുടെ പിന്തുണയെ ഷെരീഫ് സ്വാഗതം ചെയ്തു.